Хүүгийн үгс

Хэн нэгэн, эсвэл ямар нэгэн зүйлд итгэл алдармааргүй. Хүний амьдрал итгэл гээд зүйл дээр тогтдог гэж боддог...

Саяхан интернетээр Д.Сүрэнхор гэгч бичсэн гээд нэг захиа яваад, хүмүүс түүнд нь итгээд л... Би ч бас эргэлзэж л байна. Гэхдээ ер нь л худлаа харагдаад болдоггүй ээ. Энэ талаар хүмүүс санал бодлоо хуваалцаарай... Чандмань блог дээр бичсэн сэтгэгдлээ засварлаад тавьлаа:

Энхбаяр, Цолмон 2 усан тэнэг л биш юм бол тийм их мөнгөтэй байлаа гэхэд дан ганц Швейцарын банкинд бүх мөнгөө хийх үү? Зарлахаас нь өмнө аваад л өөр тийш нь шилжүүлээд 1 тэр бум хүрэхгүй болгочихож болно. Дэлхийн хэдэн ч улсын хэдэн ч банкинд хуваагаад хийж болно. Швейцарын хэдэн ч банкинд хувааж хийж болно...

Хамгийн гол нь энгийн нэг жижигхэн логикоор худлаа юм шиг санагдаад байна. Би Энхбаярыг мөнгө идээгүй гэж хэлэх гээгүй. Харин ч багагүй мөнгө халаасласан байж мэднэ гэж харддаг. Гэхдээ үгүй ч байж болно. Надад лав баримт байхгүй. Хамгийн гол нь Ардчилсан намынхан адилхан дуурайж янз бүрийн хар PR хийж байгаа нь, ард түмнээ хуурч байгаа нь таалагдахгүй байгаа л даа. Хүчирхийллийг хүчирхийллээр дардаггүй, худал хуурмагийг ч бас үнэнээр ялахаас биш адилхан худал зүйл хийснээр ялахгүй шүү дээ.

Гэхдээ яг энэ захиаг АН-аас гаргасан гэж хэлэх гээгүй АН-ын дэмжигч нэг нөхөр л бичсэн байх л даа. Тэр нөхөрт хандаж хэлэхэд иймэрхүү худал хуурмаг зүйл чинь эцэстээ ард түмнийг ямар ч итгэлгүй, хэнд ч итгэх итгэлгүй болгож байна шүү дээ.
Хэрвээ үнэхээр л энэ үнэн л юм бол түүнийг олж илрүүлээд, бодитой баримт дэлгэх ёстой байх. Энэ лав миний нүдээр зүгээр л зохиол шиг л санагдаж байна.

Яг Швейцарын банкны хувьд хадгаламж эзэмшигчдийнхээ талаар ямар ч мэдээлэл хэзээ ч гаргадаггүй. Харин эдний банкны хууль үйлчилдэггүй АНУ улсад л өөр шугамаар олж авсан мэдээллүүд (зарим нь Швейцарын болоод бусад банкны ажилтнуудыг хахуульдах байдлаар мэдээлэл олж авдаг гэсэн цуу яриа байдаг.) дээр тулгуурлан дэлхийн тэр бумтнуудыг тодруулж Форбес сэтгүүлд жагсаалт гаргадаг юм гэсэн. Тэгэхээр бүүр ингээд дансны дугаарыг нь бичээд тавьсан байх үндэслэл үнэндээ харагдахгүй байна. Тэгээд ч улс орноосоо зугтсан, (интерполиор бодвол сурвалжлагдаж байгаа байлгүй?) нэг нөхөр тэр дансыг олоод авчихсан байгаа гэдэг эргэлзээтэй юм аа.
Тэгээд итгэх үү? гэвэл би лав итгэхгүй байна л гэх байна даа...

Харин тэр авилгалтай тэмцэх газрын веб хуудасны хувьд төрийн дээд албан тушаалтнуудын мэдээлэл байгаа боловч хэнийх нь ч гэр бүлийн хүний хадгаламжийн мэдээлэл угаасаа байхгүй байна.

Хэрэв 6 сард энэ Форбес сэтгүүлийн жагсаалтанд О.Цолмон Монгол улс гэсэн хүн ороогүй байвал энэ бүхэн худлаа болно. Ард түмний өмнө Д.Сүрэнхор гэгч хүн биш Ардчилсан нам "худалч" болж харагдах болно. Зарим хүмүүсийн АРДЧИЛАЛ хэмээх ойлголтод сэв сууна. Энэ хэнд ашигтай вэ? Энэ талаар бас бодож үзээрэй...

Бас тэр Ц.Элбэгдорж Солонгосоос хууль зөрчиж хандив авсан, баримт нь байгаад байна л гэнэ. Тийм л хууль зөрчсөн баримт байгаад байгаа бол яагаад баривчлаад, ял шийтгэлийг нь оногдуулахгүй байгаа юм бэ? Гэмт хэрэгтнийг хаацайлах, гэмт хэргийг нуун дарагдуулах, холбогдох эд мөрийн баримтыг нуух, устгах чинь харин эсрэгээрээ гэмт хэрэг байдаг байх гэж санах юм?
Тэгэхээр бас л худлаа болж таарав бололтой? Тэгээд аль аль бичлэгүүдийнх нь жинхэнэ эх хувилбаруудыг бас үзсэн болохоор... Ер нь л итгэх юм надад лав нэгээхэн ч алга.

Миний мэдэж байгаа юм маань одоогийн ерөнхийлөгч, дахин сонгогдохоор нэр дэвшиж байгаа Н.Энхбаяр гэгч хүн ерөнхийлөгч байж чадахгүй гэдгээ өнгөрсөн зун харуулсан гэж боддог.

"Монгол Улсын тусгаар тогтнол, бүрэн эрхт байдал, ард түмнийхээ эрх чөлөө, үндэсний эв нэгдлийг эрхэмлэн хамгаалж, үндсэн хуулийг дээдлэн сахиж, Ерөнхийлөгчийн үүргийг шударгаар биелүүлэхээ батлан тангараглая"

Энэ бол Монгол улсын ерөнхийлөгчийн тангараг юм. Тэгвэл 2008-7-1-нд болсон үйл явдлын үед одоогийн ерөнхийлөгч маань энэ тангарагтаа хүрээгүй, хүрэх оролдлого хийгээгүй гэж би хувьдаа дүгнэдэг. Өдөр 15,16 цагийн үеэс эхэлсэн эмх замбараагүй байдал газар авч галдан шатааж, хууль сахиулагчидтай мөргөлдөөн үүссэн бодит байдал бүгдийн нүдэнд ил болчихоод байхад арга хэмжээ авч чадалгүй 9-10 цаг үргэлжлүүлж газар авхуулж дээд цэгт нь хүргэсэн. Энэ нь жирийн нэгэн миний нүдээр харахад энэ хүн үүрэгт ажлаа хийж чадаагүй, ард түмний төлөө нам эвслүүдийн эв нэгдлийг хангаж, зохицуулж, асуудлыг эвээр шийдэх чадваргүй нэг талыг баримталсан үзэлтэй буюу намч үзэлтэй ийм хүн тул эв нэгдэлтэй байлгах гэсэн хамгийн чухал үүргээ биелүүлэх чадваргүй, өргөсөн тангарагтаа хүрч чадаагүй гэж бодоод байгаа юм л даа. Миний бодлоор бол тэр үед МАХН болоод бусад нам эвслүүдийг зохицуулж, бүгдийг хуулийн дагуу шийдэж эдгээр эвслүүд ойлголцож бүгдийг хуулийн дагуу шийдэхээр болсныг зарлаад жагсаал цуглааныг тараачихаж болох байсан гэж боддог.

Харин тэр Ц.Элбэгдоржийг бол сайн мэдэхгүй юм. Хэрвээ тэр хүн 7-р сарын 1-ий тэр үйл явдалд хууль зөрчсөн бол яагаад өнөөдрийг хүртэл шийтгэл хүлээлгүй яваа юм бэ? Дээр ч бас энэ талаар дурдсан. Харин ч миний үзсэн (бас л монтажлаад эвлүүлчихсэн эсэх нь эргэлзээтэй) нэгэн бичлэгт жагссан хүмүүсийг тараахаар үг хэлж байсан.

За тэгээд ямар ч сонголтыг сонгож үзэж байж мэддэг болохоор энэ сонгуулиар Ц.Элбэгдорж гэдэг хүнд санал өгнө гэж хувьдаа бодож байгаа. Хэрвээ үнэхээр энэ хүн ерөнхийлөгч байж чадахгүй, элдэв хууль зөрчсөн хүн юм бол үүнийг Улсын Их хурлаар хэлэлцэн тэр хүнийг ерөнхийлөгч болгохгүй байх боломж ч МАХН-д байгаа байх.

Тэгээд ч МАХН-аас бусад бүх нам эвслүүд нэгдэн дэмжсэн болохоор би зүгээр ч нэг тэдгээр нам энэ хүнд итгэл хүлээлгээд байна гэж бодохгүй байгаа. Тэр хэмжээгээр Н.Энхбаяр гэдэг хүн ерөнхийлөгч байхыг тэд хүсэхгүй, түүнийг ялж оронд нь өөр хүнийг тавихыг хүсч байгаа болохоор миний бодлоор энэ удаад Ц.Элбэгдоржид санал өгнө гэж бодож байгаа. Ард түмний санал тэнцүү байж, аль нь ч олонхийн санал авахгүй бол дахин өөр хүмүүсийг нэр дэвшүүлж дахин сонгууль явуулдаг.

Тэгээд элдэв муу зүйлийг нь биш, 2 хүний аль альных нь сайн талуудыг нь хайж олоод, түүнийг харж байж санал өгсөн нь дээр болов уу. Учир нь үнэн худал нь мэдэгдэхгүй элдэв хар шар ярианууд байна шүү дээ. Өөрийн үнэмлэмж, өөрийн дүгнэлт, өнөөдрийг хүртэл таньд байсан бодолдоо л итгэ.

Тиймээс та заавал сонгуульд өөрийн дэмжиж буй хүндээ санал өгөөрэй! Өгсөн өгөөгүй ялгаагүй гэж бодож байгаа бол өгсөн ч танаас юм унахгүй учир энэ хоёр хүнийг алийг нь ч сонгомооргүй байсан ч арай илүү гэсэн сонголтдоо саналаа өгөөрэй.

Tаалагдсан, таалагдаагүй, засаж залруулмаар, зүрх сэтгэлээ илчилмээр, зүгээр л бичмээр ч юм уу ер нь л ямар нэгэн зүйл байвал сэтгэгдлээ бичиж үлдээгээрэй. ;-)