Хүүгийн үгс

гэж байх юм...  Алтан дээр сандайлсан гуйлгачид бид Алт тэвэрсэн харангадаж үхсэн хүүрнүүд болох гээд байгаа юм биш биз дээ?
Ай хорвоо...

Зарим нь мод тариад л, зарим нь ганц хүүхдийг ч болов аварчих гээд л байдаг. Гэтэл тэр хооронд нь Тэр тарьж байгаагаас нь хэд дахин илүү, хэд дахин том моднуудыг шатааж байгаад шатсан мод нэрээр тайрч ачаад байдаг. Тэрнээс олон хүүхдийн тэрнээс илүү өвчнөөр өвчлөх нөхцөл шалтгаанууд нь улам нэмэгдээд л байдаг... Хятадуудыг үзэн ядаад, эрлийзүүдийг хайж олж шийтгэх гээд, Ерөнхийлөгчөө сонгох гэж ядраад байдаг...
Модыг тарихаа боль, хүүхдийг аврахаа боль гээгүй юм шүү. Энэн шигээ энэ болохгүй байгаа зүйлстэй залуус бид нэгдэж, дуу хоолойгоо нэгтгэж тэмцэх, бусдыгаа уриалах, хүмүүст ойлгуулах талаар ямар нэгэн зүйлсийг хийх хэрэгтэй болсон мэт. Хошин шогийн тоглолт, оддын тоглолтын хандивыг иймэрхүү зүйлд зарцуулмаар юм шиг...
Нөгөө нэг хошин шог дээр гардаг шиг "Томоор хар л даа..."

1. Ус ширгээж, байгаль орчин бохирдуулж байгаа бүх төрлийн үйлдвэрлэл, уул уурхайн төрлийн үйл ажиллагааг болиулах, хаах, зогсоох хуулиудыг яаралтай гаргах, нөхөн сэргээлтийг идэвхижүүлэх ажлуудыг хиймээр мэт. Нөхөж сэргээх мөнгө байхгүй бол ядаж нурааж буулгахгүй байгаад түүнийг хийж чадах ирээдүй үедээ энэ хэвээр нь үлдээгээд өгчихсөн нь дээргүй юу?
Тэр ард түмэнд хувьцаа энэ тэр өгч болно. Гэхдээ олборлолт энэ тэрийг нь бол одоо бид олборлох цаг нь болоогүй, дэлхий нийтийн технологи, манай болоод гадаадын ажилчдын мэдлэг чадвар нь байгалийг нь сүйтгэлгүй ухаад авчих чадвар, түвшинд хүрээгүй, хүртэл нэлээд хол байгаа өнөө үед хэвээр нь орхиод, эдийн засгаа дээшлүүлэх өөр өөр арга замуудыг эрэлхийлэх нь хаа хаанаа хэрэгтэй байх гэж бодогдох юм.

Үүний цаана олон хүний ажил, амьдрал, цалин, гэр бүл байгаа. Дараа 4 жилд сонгогдох эсэх асуудал ч байгаа л байлгүй. Гэвч түүнээс хэд зуу дахин олон хүний амьдрал, бүхэл бүтэн улс орон, цаашлаад дэлхийн ирээдүйн талаар ч яригдаж  болохоор асуудал болчхоод байгаа юм шиг санагдаад байх юм. Эсвэл би хэтэрхий томруулж сүртэй болгоод байна уу?

2. Шатсан модыг бэлтгэдэг, шатсан модны гарал үүслийн зөвшөөрлийг болиулах, цаашдаа 1 модыг ч болов тайрахгүй хууль гаргаж, түүнийгээ ягштал мөрдөхгүй бол удахгүй бид амьсгалах агааргүй болчих юм биш биз дээ?
Мод маань ч бас өөрөө усаар тэжээгдэж байгаа, тайраад байвал мод тайрахын хирээр ус гол нь ширгэнэ.
Гэтэл гаргаж байгаа хүчилтөрөгчөөр нь амьсгалах хүн амын маань тоо өдөр тутамд нэмэгдэж байна, агаар хуваалцах, амьсгал булаалдах хүний тоо олшроод л байна...

Амьсгалах агаар, уух усгүй болчихоод баахан ганган сайхан машинуудтай, паргүй усгүй, гялгар шилтэй, шилгүй баахан цементэн барилгатай, мэрээд идье идэж болохгүй, буцалгаад ууяа ууж болохгүй болчих вий дээ. Энд залуус бидний дуу хоолой дутагдаад байна уу даа... Энэ талаар хүн бүр өөрийн бодлыг блог болоод чадах бүх хэлбэрээр хэлж ярьж хүмүүсийн чихэнд хүргэмээр... Өнөөдөр бид өнөөдрийн хоол, өмсөх зүүхээс арай цааш харахгүй бол ангалын эрмэг дээрээс нарийн мөчирт дүүжлэгдсэн алим руу үсрэх гээд байгаа мэт? Хөлийнхөө доошоо хальт хармаар юм шиг...

Зам барих, ток татах гээд бүгдийг мөнгөөр хийнэ, тэр мөнгийг уул уурхайгаас олборлоно гэж ярьж байгаа. Аа гэхдээ замтай токтой, мөнгөтэй болтол амьсгалах агаарыг маань үйлдвэрлэдэг ой модгүй, уух гэсэн гол усгүй болсон байвал замаа чанаж ууж, цахилгаанаар амьсгалцгаах болох уу? Яах вэ?