Хүүгийн үгс

Энэ талаар та бүхэнтэй саналаа солилцохыг их хүсэж байна. Их байна гэж өнгөрөөлгүй уншаад санал солилцохыг хүсье!

Зурхай гэдэг бол олон зуун жилийн туршид хүмүүс судлаад ирсэн агуу том шинжлэх ухаан. Зарим нь мухар сүсэг гэж ярих нь бий. Яг ямар үндэслэлээр, ямар баталгаагаар тэгж шууд мухар сүсэг гэж хэлээд байгааг нь бас ойлгодоггүй. Хэрвээ хийсвэр сэтгэлгээгээр тэгж байгаа бол, одоогийн мэдээлэлдээ тулгуурлаад тэгж байгаа бол "500 жилийн өмнө дэлхийн бүх хүн дэлхийг хавтгай гэж боддог байсан" гэсэн нэг өгүүлбэрийг уншсанаа таньд бас дамжуулъя...

Үс авах өдөр, малын үс ноос хяргах өдөр, ажил үйлс бүтэх өдөр, бүтэхгүй өдөр г.м. Би бол иймэрхүү зүйлийг аль болох дагадаг. Үнэхээр тийм эсэхийг би мэдэхгүй. Бас үүнийг хэн ч шууд баримттайгаар үгүйсгэж чаддаггүй. Миний хувьд миний уншиж байсан өрнө, дорнын аль ч зурхайд хүний зан чанарыг, хоорондын таарамж тохироог судлаад бичсэн байдаг нь лав л 50-аас дээш хувьтайгаар таарч байх шиг санагддаг. Та ч гэсэн энэ бүхнийг анзаарсан байх. Тийм болохоор эдгээр од эрхсийн хөдөлгөөн хүний бие мах бодид, хүний сүнс хэмээх био энергид нөлөөлдөг байхыг үгүйсгэх газаргүй мэт. Тэр нь тухайн хүний тэр өдөр хийсэн үйлд илэрдэг байж болох... Хүнийг төрөх хүртлээ гэдсэндээ боловсроход нөлөөлж байгаад төрөхөдөө тэр хүн тухайн ямар нэгэн тэр өдөр төрсөн хүмүүстэй нийтлэг шинж, зан чанартай байж болох...

Хэдий тийм боловч би зурхайчдыг шүтэх, тэдэнд мөнгө төгрөг барьж мөргөхийг, календарь худалдаж авахыг бол дэмжээгүй юм шүү. Харин ч өргөл барьц авалгүй буян үйлдэж байгаа хүн байвал тэр л жинхэнэ нигүүлсэнгүй, гэгээрсэн хүн байх гэж боддог.

Шашины талаар бас ойрын үед хүмүүсийн блогуудыг уншаад нэлээн бодоод өөрийн бодлыг цэгцлэе гэж бодлоо. Тэгээд бусад шашиныг нэг их ойшоож үздэггүй (зөвхөн миний бодол шүү) болохоор өөрийн дагаж явдаг шашинаа энд бичье гэж бодлоо.

Бөөгийн шашины талаар миний бодол: Зарим хүмүүс эртний шашин, хуучин мухар сүсэг гэх нь бий. Харин ч бусад шинжлэх ухаанлаг шашингуудаас илүүтэйгээр байгальдаа ойрхон уул ус, эцэг өвгөдөө дээдэлж шүтдэг, байгаль орчноо байнга хайрлан хамгаалж ирсэн шашин болохоор энэ шашины хувьд бөө гуайд итгэж энэ тэр болоод хэт муйхарлахгүй (болохгүй байсан бөөг цаазалж байсан түүх бий) шүтвэл жинхэнэ Монголчуудад хэрэгтэй шашин юм даа гэж боддог. Бөөг биш нутаг усаа, эцэг өвгөдийнхөө сүнс сүлдийг дээд тэнгэрээс биднийг харж байгаа гэсэн утгаар нь шүтдэг болохоос бөөлж мэргэлдэг бөө гээч өөрийгөө өргөмжилсөн этгээдийг, эсвэл хаана ч байгаа үгүй нь мэдэгдэхгүй хоосон бурхныг шүтдэггүй гэдгийг ялгаж салгаж ойлгох хэрэгтэй байх...
Булаг, голын усанд ч сүү дусааж болохгүй лус хилэгнэнэ гээд л, нутгийн нэг чулууг хүртэл хайрлан хамгаалж, өвс ногоо ховор ан амьтнаа лусын амьтан хэмээн хамгаалдаг байсан. Өөр газар оронд явахдаа ч нутгийнхаа лус савдагт залбирч, эх нутгаа санаж явдаг болохоор би энэ шашинд их элэгтэй хөөн. Тэгээд ч надад лус савдаг, эцэг өвгөдийн минь сүнс сүлд тусалж байдаг гэдэгт үнэн голоосоо итгэдэг. Хэдий мухар сүсэг, энэ тэр гэж ярьдаг ч гэсэн яг Монголчуудын амьдралаас ихэнхи нь ургаж гарсан болохоор хориглодог, нүгэлддэг юмнууд нь бас л амьдралаас үүдэлтэй санагддаг. Зарим нь бүүр утгагүй, боломжгүй юмнууд ч таараад байдаг нь сонин... Харин буддатай холилдоод бантан болчихоод байгаа тал бас байгаа...
Олон нохой алсан хүний амьдрал өөдөлдөггүй гэдэг, үнэхээр амьдрал дээр тийм л байдаг, уул ус хөндсөн хүмүүс ч бас тэр шийтгэл гороо амсдаг гэж боддог.

Буддын шашины талаар: Агуу гүн ухаан, зурхай энэ тэр гээд шинжлэх ухаануудыг агуулсан боловч Монголчуудад гай тарьж, тэр нь одоо ч үлдээд үргэжилсээр байгаа шашин. Их хуучирсан. Сайжруулах ёстой эд гэж боддог. Ламыг шүтэж, ойлгохгүй номыг сонсож суух нь тиймэрхүү... Мөнгө төлөөд хэн нэгнээр таг мэдэхгүй хэлээр ном уншуулаад сайн болчихдог гэхэд бас л хэцүү...

Сүүлийн үед Монгол уншлагатай сүм энэ тэр гараад, бас хөгжих гээд л байгаа...
Сүүлийн үед зарим лам, их том хамба болчихсон тууж яваа худалч залихаа этгээдүүд ч зөндөө болжээ, далай ламын гар хөлийг долоох шахам дагаж яваа нь инээдтэй... Хүнийг ална шүү гэж хараадаг, хүүхэн жирэмслүүлчихээд хаядаг тийм лам нар ч цөөнгүй...
Мэдээж мэдлэгтэй чадалтай ухаантай лам нар ч байгаа.

Нэг зүйлийг ойлгох хэрэгтэй мэт. Бурханд, ламд өргөл барьц өгөх хэрэгтэй гэж сургадаг лам бол шаал худлаа шүү дээ гэдгийг. Үнэхээр л нигүүлсэнгүй, гэгээн хүн бол таниас ухаантай байхыг л хүсэхээс мөнгө, хоол унд хүсэхгүй, тэгээд ч тэр холын хол тэнгэрт байгаа бурхан таны өргөсөн дээжийг хүртэхгүй шүү дээ. Харин та үнэхээр тэр ламаас ухаарлыг олоод тусыг нь хүртсэн бол түүнд туслаач гэж өгөх биш тусласных нь хариуд өгөхийг хүсвэл өгөх ёстой юмаа. Лам нар ч ингэж сургах ёстой хүмүүс шүү дээ уг нь.

Ламыг биш сургаалийг шүтдэг болцгоохсон. Далай ламаас адис авбал, эсвэл цацсан будаанаас нь идвэл сайн болчихдог гэдэг ойлолтыг нь хүмүүсийн толгойноос авч хэлсэн үгийг нь тогтоогоод маань болгоод давтаж явбал уг нь хэрэг болох юм шиг санагддаг..
Жишээ нь би бол өглөө босоод 3 удаа, өдөр 3 удаа, орой 3 удаа "Aрхиан бага ууж, айргаан тааваар уу" гэж Далай лам багшийн сургаалийг нийт 9 удаа уншдаг юм Мартахгүйн тулд Тэр хүнийг харж баясаж мөргөж, адис авах нь гол биш үгийг нь сонсож, ухан ойлгож дагаснаар хүн ариусч ажил үйлс нь зөв замаар бүтэмжтэй явах ёстой юм гэж ойлгоод байдаг юм.

Гандан дээр очоод мөнгө төгрөг тавьж, идээ будаа өргөж даварсан ном муутай лам нарыг өөгшүүлж тэжээж, тордож байхаар гадаа нь байгаа тагтааг хоолловол илүү буян болно гэж боддог юм. Үнэхээр ном сонин уншуулж, засал хийлгэмээр байгаа бол ядаж Монгол хэлээр уншуулаад, өөрөө сонсоод, ойлгож ухах гээд үзвэл ядаж тархи толгойнд амралт болох мэт....

За тэгээд энэ зөвхөн миний үзэл бодол болохоор буруу ярьж байгаа бол та ч гэсэн өөрийн үзэл саналыг надад хэлж өгөөрэй.



За тэгээд энэ завшааныг ашиглаад энд тэнд суугаа анд найз, хамаатан садан, хайрт бүсгүйчүүд, болон 100000 гэрлийн жилийн тэртээд суугаа өвөг, элэнц эмээ өвөө нартай сар шинийн мэнд хүргэеээ!
Эрдэнийн зүйлээр бөөлждөг (халаасаа сайн тосоод дүүргээд аваарай )
Эрүү цагаан хулгана жилдээ
Элгээрээ энх амгалан, төрлөөрөө түвшин амгалан байж
Идэж уух нь хоргүй, элбэг дэлбэг байж
Эмнэлэгээр шагайлгүй эрүүл саруул байж
Спорт, урлагаар хичээллэцгээж
Бусдад эелдэг хандаж
Буцаагаад энерги авч
Инээж наргиж, хөөрч, баярлаж,
Хүмүүсийг өөртөө татаж,
Хүссэн бүхнээ биелүүлж явахын өлзий дэмбэрэлтэй ерөөлийг өөд өөд нь өргөн дэвшүүльеэ!
Сар шинэдээ сайхан шинэлээрэй!

Tаалагдсан, таалагдаагүй, засаж залруулмаар, зүрх сэтгэлээ илчилмээр, зүгээр л бичмээр ч юм уу ер нь л ямар нэгэн зүйл байвал сэтгэгдлээ бичиж үлдээгээрэй. ;-)